Адкрытасць, якую яшчэ трэба знайсці

На Полі Пастушкоў у Бэтлееме

Глядзіш на любую батлейку – Святая сям'я адкрытая кожнаму, хто прыходзіць. Ты не ўбачыш іх спінаў, Марыя і Юзэф не засланяюць Святое Дзіця, калі ж прыхадні бываюць розныя. Вось мы з табой – нібы сланы ў пасуднай краме, як ні павернемся, так нешта непапраўна разносім на дробныя кавалкі. Вядома ж, мы не хацелі, вядома ж, прабачаемся і больш не будзем. Але шчыра кажучы, небяспечна такіх пускаць на парог, а тым больш давяраць Дзіця...

А Святая Сям'я так і не зачыніла дзверы – не толькі перад безыменнымі пастушкамі і таямнічымі каралямі – а чакаючы нас з табой, хоць невядома дзе падзеліся нашыя сцежкі... Толькі надзея, што аднойчы мы згададаемся проста павярнуцца тварам да Таго, Хто заўсёды блізка. Як пераступіць парог Батлейкі і вярнуцца дадому...